Sparisjóður Suður Þingeyinga


Grunsamlegir tenglar í tölvupósti - ekki smella!

07.10 2014

Grunsamlegir tenglar í tölvupósti - ekki smella!

Aftur hefur orðið vart við tölvupósta þar sem viðskiptavinir banka og og fjárrmálafyrirtækja eru beðnir um að smella á tengil inn í póstinum og gefa upp notendanafn og aðgangsorð að heimabönkum. 

Almenningur er hvattur til að vera á varðbergi gagnvart slíkum tölvupósti og smella ekki á slíka tengla. Bankar og fjármálafyrirtæki biðja viðskiptavini sína aldrei um notendaupplýsingar í gegnum tölvupóst, né hvetja þá með þeim hætti til að skrá sig inn í heimabanka.

Gott er að senda grunsamlega tölvupósta til viðkomandi sparisjóðs, sem viðhengi, til upplýsinga starfsfólk hans og eyða síðan viðkomandi skeyti tafarlaust.

Ennfremur er fólk hvatt til að fara ekki í heimabanka nema í gegnum vefsíður viðkomandi sparisjóðs.

Þeir sem hugsanlega hafa  smellt á hlekk úr tölvupósti, eins og þann sem lýst er hér að ofan, eru hvattir til að skipta um lykilorð í heimabankanum og kynna sér  upplýsingar um öryggi á heimasíðu sjóðanna.

Ítrekað skal að viðskiptavinum er eftir sem áður óhætt að tengjast heimabanka sínum með venjulegum hætti í gegnum vefsíðu viðkomandi banka eða fjármálafyrirtækis. 

Eftirfarandi er gott að hafa í huga fyrir þá viðskiptavini sem nota heimabanka:

Notendur eiga aldrei að smella á grunsamlega tengla í tölvupósti.

Gott er að hafa það fyrir reglu að tengjast heimabanka eingöngu í gegnum heimasíðu viðkomandi banka eða  fjármálafyrirtækis.  Þetta skal einnig hafa í huga þegar um viðkvæmar upplýsingar eða viðskipti af öðru tagi er að ræða.

Bankar og fjármálastofnanir senda aldrei viðskiptavinum sínum tölvupóst þar sem notendur eru beðnir um að uppfæra upplýsingar um sig með því að smella á hlekk í skeytinu eða senda upplýsingar með því að svara póstinum. Þetta á t.d. við um notendanafn, lykilorð eða greiðslukortaupplýsingar.

Þegar farið er inn í heimabanka ber að gæta þess að slóðin í vafra sé á öruggu vefsvæði, það sést með því að ganga úr skugga um að https:// sé fremst í vefslóð.